Ragnhild Berg blir den mye medarbeidaren til Vest-Norges Brusselkontor. Ho byrjar i februar neste år, og går inn i den nyoppretta stillinga som prosjektrådgivar. Målet er å vidareutvikle arbeidet til VNB-nettverket med EU-program, prosjekt, finansiering og partnarskap.
Anna, Ragnhild og Audun blir dei tre fast tilsette i VNB i 2027. Foto: Kaia Dahl-Solheim
– Vi er veldig stolte over å få Ragnhild med på laget. Det inneber ei kraftig styrking av både kontoret i Brussel og VNB-nettverket på Vestlandet, seier VNB-direktør Audun Lysbakken.
– Ragnhild kjem med unik erfaring som vil komme heile regionen til gode. Ho vil bidra til at medlemmene våre blir langt betre rusta til å finne relevante prosjekt- og finansieringsmoglegheiter og til å lukkast med slike prosessar, seier Lysbakken.
Dei siste ti åra har Ragnhild Berg leia Brusselkontoret til Direktoratet for høgare utdanning og kompetanse (HK-dir). Før det var ho nasjonal ekspert i Europakommisjonen i fleire år. Berg kjem frå Bergen og ser fram til å arbeide for landsdelen sin:
– Eg gler meg til å jobbe tett på medlemmene og konkret med prosjekt. VNB har svært mange spennande medlemsinstitusjonar, og det blir veldig kjekt å bli kjend med dei alle.
I tillegg til å arbeide med programutlysingar og prosjekt skal Ragnhild Berg følgje utviklinga i EUs utdannings- og forskingspolitikk og rapportere om denne til VNBs medlemmer. Ho får òg rådgivaransvar for eitt av dei andre prioriterte fagområda i strategien til VNB.