Satsingsområde

Vestlandet er ein del av løysinga for at EU skal nå sine mål. Vi har grøn energi, kunnskap og teknologi som Europa treng. EU er ei drivkraft innan klima, miljø og grøn næringsutvikling, og kunnskap om moglegheiter i EU gir oss eit konkurransefortrinn. I kombinasjon med finansieringsmoglegheiter kan det bidra til å realisera berekraftige prosjekt og grøne løysingar i Vest-Norge, til beste for den europeiske fellesskapen.

Vest-Norge er verdsleiande innan marine og maritime verksemder. Geografien vår og naturgitte forhold gjer regionen til ein kunnskapsbank og utprøvingsområde for innovative løysingar. For EU er den blå økonomien ein del av dei grøne løysingane. Samtidig aukar presset om bruk av havet og kystareala. Vest-Norge kan her ta ein posisjon i Europa ved å utvikle berekraftige løysingar basert på kunnskap om ressursane og økosystema i havet.

Dei neste tiåra vil befolkningssamansetninga endra seg merkbart i Vest-Norge. Fleire eldre, lågare fødselstal, færre yrkesaktive og auka utanforskap utfordrar dagens velferdsmodell. Her har vi mykje å lære av andre europeiske regionar på korleis vi sikrar god tenesteproduksjon med færre ressursar, og vi har eit utgangspunkt for å tenke helse og velferdsteknologi som ein del av næringsutviklinga vår.

Dei demografiske endringane vi står overfor vil få store konsekvensar for kommunane og kommunal tenesteleveranse. Vi står i ein situasjon med rekrutteringsutfordringar, samtidig som ein høg del i arbeidsfør alder står utanfor arbeidslivet. Den demografiske utviklinga krev nytenking og at vi jobbar saman på nye måtar. Det krev at vi ser på attraktiviteten vår, fortrinna våre innan natur og destinasjonsutvikling på ein ny måte, samtidig som vi inkluderer frivillig sektor i større grad i lokale styringssystem. Dette kan og bør utviklast i samspel med andre europeiske regionar, og ved hjelp av europeisk finansiering.

Digitalisering skal gi innbyggjarane tilgang til effektive og trygge tenester, og skal sikre deltaking i samfunnsliv. EU spelar ei nøkkelrolle i digitalisering gjennom sin «Digital Agenda for Europe» og investeringar i teknologisk forsking og utvikling. Dette vil støtta integrering av ny teknologi og digital transformasjon i regionen. I tillegg vil det gi nødvendig kunnskap for å forstå moglegheitene og avgrensingane som ny teknologi vil medføra for framtidas tenesteproduksjon hos medlemane.

Kontinuerleg utvikling og bruk av ny internasjonal leiande kunnskap er avgjerande for at Vest-Norge skal vera ein berekraftig og framtidsretta region. For å lykkast innan dei andre strategiske satsingsområda i strategien, er det nødvendig med auka deltaking i EU sine program innan forsking, innovasjon, utdanning og livslang læring. Regionen og medlemane i VNB har eit stort uforløyst potensial for å kopla eige utviklingsarbeid tettare på EU sine program og verkemiddel. Dette gjeld spesielt større samfunnsutfordringar og utlysingar som fordrar eit regional partnarskap.

Vest-Norge, som ein del av Europa, står overfor eit komplekst tryggingspolitisk og klimatisk landskap som krev motstandsdyktige løysingar for å sikra kritisk infrastruktur og forsyningstryggleik. Regionen vår har viktig energiinfrastruktur, sentrale hamner, ein sterk maritim sektor, samfunnskritisk industri, og dessutan viktige forskings- og kompetansemiljø. Vi må også skape større forståing for risiko ved informasjonsdeling, datatryggleik og internasjonalt samarbeid.