Vi er representasjons-kontoret til Vest-Noreg i EU

Sidan 2003 har Vest-Norges Brusselkontor hjelpt til med å gjere Vestlandet meir synleg i det europeiske samarbeidet.

VNB lagar arrangement som viser fram regionen i Brussel og er vegvisar for vest-norske aktørar som vil finne fram i EU-systemet. VNB er vertskap for delegasjonar og besøk heimanfrå, og legg til rette for møte med europeiske partnarar og norske representantar i EU-hovudstaden. For medlemane våre bidreg vi med både fagleg program og møtelokale, og vi tek imot hospitantar og studentpraktikantar.

Arrangement

VNB arrangerer, åleine og i samarbeid med andre, seminar, kurs og møter både i Vest-Noreg og i Brussel. Vi utviklar kurs der medlemane kan lære meir om EU/EØS og dei ulike programma Noreg deltek i. Vi lagar seminar i Brussel der viktige spørsmål for regionen blir satt på dagsorden, og vi viser fram Vest-Noreg gjennom arrangement i samband med EU sine temaveker og andre større hendingar i Brussel.

VNB deltek òg med faglege bidrag på arrangement hos medlemane på Vestlandet, og formidlar oversikt over EU‑arrangement som kan vere relevante for dei.

Sjå oversikt over arrangement

Delegasjonar og studiebesøk

Både i offentleg forvaltning, næringsliv og sivilsamfunn er det stor interesse for å besøke Brussel og sette seg inn i EU-systemet og påverknaden det har på Norge.

VNB tek imot eit stort antal besøk, og deler innsikt frå arbeidet vårt med mange norske delegasjonar. Vi prioriterer besøkande frå Vest-Noreg. For delegasjonar frå medlemsinstitusjonane legg vi til rette for både fagleg opplegg og gratis tilgang til lokale i Norway House, midt i EU-kvartalet i Brussel.

Tilsette frå medlemmene som er på oppdrag i Brussel kan få tilgang til arbeidsplass hos oss. VNB og Høgskulen på Vestlandet har ein fast avtale om hospitering for HVL-tilsette.

VNB tek òg imot studentpraktikantar, som søkjer via sin utdanningsinstitusjon.

Norway House

VNB held til i Norway House, saman med den norske EU-delegasjonen og ei rekkje norske organisasjonar, etatar og verksemder.

Norges Hus ligg rett over gata frå hovudkvarteret til Europakommisjonen, Berlaymont, med gangavstand til alle dei sentrale EU-institusjonane. Her har vi kontora våre, og VNBs medlemar har tilgang til møterom og konferansesal.

Planlegg de eit delegasjons- eller studiebesøk til Brussel? Ikkje nøl med å ta kontakt med oss: post@west-norway.no