Ullensvang kommune
Ullensvang ligg vakkert til og er sjølve hjarta i Hardanger. Kommunen har omlag 11 000 innbyggjarar, der Odda er administrasjonssenter i kommunen omkransa av sterke bygder.
Kommunen er prega av sterke kontrastar og eit mangfaldig samfunns- og næringsliv. Her finn du fjord, fjell, fonn, frukt, landbruk, havbruk og verdsleiande industri i ein og samme kommune.
Grøn industri og berekraftig energi
Kommunen har ei stolt industrihistorie der vasskraft, og reinsing og foredling av metall har stått sentralt i over hundre år. I dag er Ullensvang ein framtidsretta industrikommune med stort fokus på berekraft, sirkulærøkonomi og det grøne skiftet. Med rik tilgang på rein, fornybar vasskraft ligg tilhøva godt til rette for framtidas utsleppsfrie industri og nye, grøne verdikjede.
Noregs frukthage
Ullensvang er landets største fruktkommune. Regionen har dei siste åra opplevd ein formidabel renessanse innan handverkssider. Hardangersideren har i dag ein sterk posisjon både nasjonalt og internasjonalt med sin verna geografiske nemning.
Natur og reiseliv
Med naturperler som Trolltunga, Dronningstien, Låtefossen, Hardangervidda- og Folgefonna nasjonalpark, trekkjer Ullensvang til seg turistar frå heile verda kvart år. Kommunen satsar på eit berekraftig reiseliv som tek vare på naturen, samstundes som det vert lagt til rette for unike opplevingar innan kultur, mat og friluftsliv.
Kultur, fritid og aktivitet
Fjordromantikk og ski-eldorado, siderklynga og litteraturhovudstad, blues og kammermusikk, fredelege naturopplevingar og spektakulære utfordringar. Ullensvang har eit rikt og variert aktivitetstilbod til alle årstider og for alle aldrar – her er det godt å bu og leve for både store og små.
