Kvinnherad kommune har blitt med i VNB-nettverket

/i /av
Det er ei stor glede å ønskje Kvinnherad kommune velkommen i VNB-nettverket. Kommunen har lange tradisjonar innan industri, kraftproduksjon og naturbasert næringsliv, og er ein aktiv deltakar i arbeidet med grøn omstilling og berekraftige løysingar.

Kvinnherad kommune ligg i Sunnhordland på Vestlandet, med Folgefonna, fjordlandskap og store naturressursar som viktig utgangspunkt for verdiskaping og samfunnsutvikling. Med om lag 13 000 innbyggjarar og eit mangfald av levande lokalsamfunn, har Kvinnherad eit breitt og robust næringsgrunnlag. Kraft og energi, prosessindustri, småkraft, maritime verksemder, landbruk, havbruk og reiseliv er sentrale berebjelkar. Kommunen har særleg sterk kompetanse innan fornybar energi og industribasert verdiskaping, tett kopla til nasjonale og europeiske mål om klimaomstilling og energitryggleik.

Gjennom deltaking i internasjonale samarbeid ønskjer Kvinnherad kommune å styrkje kompetanse, nettverk og tilgang til relevante verkemiddel for lokal og regional utvikling. Tema som grøn industri, fornybar energi, klimatilpassing, berekraftig samfunnsutvikling og regional utvikling er særleg relevante for kommunen. Kvinnherad ser slikt samarbeid som ein viktig arena for å hente innsikt, dele erfaringar og utvikle prosjekt som kjem både lokalsamfunn og næringsliv til gode

Ordførar Vegard Bjørnevik meiner det er både interessant og viktig å bli kjend med VNB og å ta del i arbeidet med å byggje solid innsikt i internasjonale rammevilkår som påverkar kommunen.
Eg ønskjer at Kvinnherad skal vere offensiv og i forkant av avgjerder som kan få stor betydning for lokal utvikling. Med ei rekkje sterke, eksportretta næringar har kommunen mykje å tene på å vere godt førebudd og aktiv i desse prosessane.
Kvinnherad kommune har ei tydeleg rolle som samfunnsutviklar og tilretteleggar. I samarbeid med næringslivet, offentlege aktørar, forskingsmiljø og frivillig sektor arbeider kommunen strategisk for å leggje til rette for innovasjon, nye investeringar og vidareutvikling av eksisterande verksemder. Kommunen har god erfaring med samskaping og langsiktig planlegging, og ønskjer å vere ein pådrivar for utvikling som styrkjer både lokal og regional konkurransekraft.

Direktør Audun Lysbakken er særs nøgd med å få kommunen inn i VNB-nettverket.

Det er veldig kjekt å ønskje Kvinnherad velkommen til VNB. Vi håpar og trur at medlemskapet vil bli til nytte for kommunen. Kvinnherad er ein kommune med eit variert, spanande næringsliv og internasjonalt utsyn. Kvinnherad blir ein verdifull deltakar i vårt nettverk, og vi gler oss til samarbeidet.