European Union 2026EU sett kultur på dagsordenen
Europakommisjonen, Europaparlamentet og Rådet har for første gong samla seg om ei felles politisk erklæring som skal gi kultur ein tydlegare plass i EU. Rådet var representert av Kypros, som hadde formannskapet første halvår 2026.
Erklæringa slår fast at kultur skal vere ein del av europeisk politikk på tvers av politikkområde, samtidig som det nasjonale ansvaret for kultur blir respektert. Det blir lagt vekt på kunstnarisk fridom, kulturelt og språkleg mangfald, inkludering samt gode arbeidsvilkår for kunstnarar og kulturarbeidarar. Kultur blir òg framheva som viktig for demokrati, innovasjon og regional utvikling.
Erklæringa byggjer vidare på Kulturkompasset til EU, som Kommisjonen la fram i november 2025. Du kan lese vår oppsummering her.
Erklæringa peikar ut 12 rettleiande prinsipp for europeisk kulturpolitikk:
- Fridom til kunstnarisk uttrykk og retten til å skape.
- Kulturelt og språkleg mangfald.
- Tilgang til kultur for alle.
- Rettferdige, gode og trygge arbeidsvilkår for kunstnarar og kulturarbeidarar.
- Ungdom skal vere representerte i og delta i kulturlivet.
- Samspel mellom kultur, kunst og utdanning.
- Kultur sitt bidrag til helse og livskvalitet.
- Etisk og ansvarleg bruk, utvikling og styring av kunstig intelligens.
- Vern, ivaretaking og fremjing av kulturarv.
- Kulturen si rolle i regional og lokal utvikling, motstandskraft og sosialt samhald.
- Kulturen sitt bidrag til miljømessig berekraft.
- Promotere kultur og kulturarv i EU sin politikkutvikling på europeisk og globalt nivå.
Med denne erklæringa forpliktar dei tre EU-institusjonane seg mellom anna til å integrere kultur i relevante EU-strategiar samt fremje innovasjon og finansiering av dei kulturelle og kreative næringane. Dei forpliktar seg også til å synleggjere Europa si rolle som ein global leiar innan kultur og kreativitet.
Erklæringa er ein del av oppfølginga av Kulturkompasset. Kulturkompasset viser veg, mens erklæringa gir brei støtte frå dei tre sentrale EU-institusjonane. For kultursektoren kan dette bety at kultur i større grad blir sett på som ein del av samfunnsutviklinga og ikkje berre som eit avgrensa område.
Les heile erklæringa her.
Foto: European Union 2026
VNB